***دقات قلبى ايقاع الفرح***
دقات قلبى ايقاع الفرحاحم احم
وانت داخله قلبى .. بشويش
عشان الحب النعسان
مابين رموشك جوه القلب
ميصحاش على فجأة
ويعمل ازمه بدون داعى...
طبعا مش هتسمعى الكلام
زى عوايدك وبرضه هتحاولى
ببرفانك اللى متعود عليه
تقلقى الروح وتنورى العتمه
بضحكتك..
انا
مش مسؤول عن ناتج اللى هتعمليه
وعن تضحياتك الجريئه فى حبك ليا
ولا اقدر اوعدك انى هاحجّم قلبى
واقدر اطبطب عليه واقول له
معلش النوبادى..
قلبى اللى تملى يعاند
كل حاجه متكونش على هواه
وديما يعمل هيصه ويتعبنى..
خليكِ ريلاكس
وطاوعينى مره واحده
هتلاقى قلبى لوحده ياخدك فى حضنه
ويرفرف بجنحاته فى سما
مالهاش حدود واوسع من عيون الكون
وتحت الشجره فى اخر الجنينه
اللى محدش بيقعد تحتها غيرنا
هتلاقيه حاطط ولسه النفس الخارج منه
شايل ريحة برفانك وبيغنى عدودة حزن قديمه..
يمكن من خوفه من بكره
ومن غيابك اللى بيطول من غير مبرر...
عارفه ان احم احم
لما بتقوليها كأنى بسمعها لاول مره
وانها زى عروسه بيزفها الخجل
قلبى بدقاته بيعمل ايقاع اغانى الفرح
وكل الناس بتغنى معاه...
يا روح تملى مهاجره
واخده معاها الشوق وهوا الشارع
ونفس الناس ساعة العصارى
ديما تخلى الدنيا حواليا فاضيه حتى
من دخان سيجارتى اللى بيرسم
صوره ليكى ..
انا ..
مستنى لحظة رضا وصدق حقيقى
وعيون شايله صورتى وانا لسه صغير
تملى بتضحك وتفكرنى بالبراءه
واحنا عيال...
روحى وانا عارف كل البعد ما ياخدك
هاتجينى متشوقه للونس
على خدك دمعه متدحرجه من عيون
وحشتنى قوى ....
بقلم : عاشور الزعيم
ليست هناك تعليقات: