ابعتنى يا قلبى مشوارك وبلاش تعمل ازمه ما بينى وبينك وتكسّر ضلوعى وتبطل تدينى الدم اللى بعيش بيه وتفضل تحرّض فى الروح انا ديما بسمع دقاتك فى اوقات كتير بتختلف عن بعضها وبتعمل ثوره يمكن لان هدوئى مش عاجبك... انا هطاوعك وها اعمل عبيط مع انى عارف انى مش هلاقيك اخر الطريق ودقاتك صوتها ها يختفى وسط الزحمه وصوت بتاع الجرايد وهو بينادى اخبار اهرام جمهوريه.. صورتها المرسومه جواك وعطرها الخفيف الناشع من صورتها اللى قدامك ليل ونهار عيونها المليانه شوق وهى بتلبش جتتك كل ما تبصلها وبتخليك دايما محتاج تغمض عنيك لجلن تتخيلها مع اول لمسه لايدها الاقيك سايبنى وخالع تفضل ماشى فى صحرا تغنى غنوه قديمه كنا بنغنيها سوى لما ارجع من مشوارك اللى بعتنى ليه تيجى جرى ونبض الخوف سابقك ها تتجنن تسمع ايه اللى حصل وقلنا ايه لبعضنا.. طبعا ساعتها هموت من الضحك عليك لان البنت اللى قابلتها مش هى حببتك متكشرش قوى كده وتتحمق ماهى ياما مواعيد ما بتحصلش ياما العمرشايل حواديت كتير الروح بتخرج ويا الموت وبنستنى ترجع ما بترجعش ياااااااااااااااااااااااه مشوار طويل مشيناه ما تيجى ناكل طبق كشرى اهو لسه الليل طويل لسه ياما هاتشوف حاجات كتير .. اول ما تشوف روحك فى المرايا وانت داخل من باب البيت تلاقى عنيك وخداك ورايحه مكان صورتها المتعلقه جواك النجمه اللى تملى كانت بتقف على الشباك مطفيه والسما عتمه عارفك ها تقعد مستنى الهدهد يجبلك خبر عنها.. فى الصبح وانا بشرب كباية الشاى واقرا اخبار اليوم منذ الساعه تقريبا استقلت الفاتنه م.م الطائره البوينج 777 المتجهه الى بيروت.. الراديو جنبى عمال يذيع غنوة يا صباح الخير بللى معانا ...